Lo govèrn de Zimbabwe a fach public un acòrdi amb la Republica Populara de China, que farà del yuan una moneda de cors oficial dins lo país. Las transaccions entre los dos païses se faràn en yuans chineses e la moneda se poirà utilizar dins las transaccions entre las entrepresas e los particulars en Zimbabwe quand s’establiràn los acòrdis oficials. En contrapartida, China escafarà per Zimbabwe una partida del deute.
 
L’influéncia de China sul continent african es de mai en mai granda, mas una mesura coma aquela s’èra pas vista encara. Ara la moneda chinesa a emprés un procès d’internacionalizacion e Zimbabwe serà lo primièr país del Mond a l’adoptar coma sieuna. A l’ora d’ara, en mai del dolar de Zimbabwe, fòrça descreditat, i a tanben coma moneda de cors legal lo rand sud-african. Lo principal investidor dins aquel país es justament la Republica Populara de China.
 
I a de païses del Mond qu’an adoptat de monedas estrangièras coma lors. En particular: l’èuro s’es adoptat en Kosova e lo dolar s’es adoptat en Panamà e l’Eqüator. Mas fins ara cap de país aviá pas encara adoptat lo yuan.